Nadal 2020

En bon Nadal a tutti canti, che el Bambinel ensema a so mare e spezialment a so pare (chel pù potente – el Padre Eterno) el se ricordia de noi autri semper ma chest an amò depù con sta bestiaza che zira e po’ canche el deventa grandot el vardia zo el ne aidia perché cì su en sta tera g’è semper da strusiar. Che bel el Nadal canche podeven scanzelar tuti i pensieri, conzentrarme enta mesa, entel vesper e ente orazion, destaciarme dai zentomili afari e pregiar coi ocli sul Bambinel e su so mare, la Madona, e su San Zusepe, el so om.

L’è vera che mi, Caterina, i ultimi ani eri enta Piaza San Pietro per la Mesa e la predicia del Papa, ma semper ente na gran conzentrazion e “spiritualità”. Empareva de eser al zentro del mondo ensema al Bambinel. Ma giai semper abù strani dal bel del paes, dala glesia eliegra e plena de flori, dala conzentrazion dela zent, dale lum potenti che empareva le te portas en paradis e dai cianti dei cori che en ca mesa de Nadal i vafa ruar la os al ziel e tut la zent enta glesia i se sentiva boni tuti ensema e trasportadi enti “alti” zieli.

Ancia mi, Liliana, giai semper avù strani dal paes, dal so Nadal, ancia se poret, come eren poreti ‘nchei ani io, con tanta neo, no come ades, le slite che se nideva zo dal Dos o dala Val anfin an piaza, e la zent che la brontolava perché se ‘nglazava le strade e se podeva slimpegiar. I diaolini e le bugianze ntei pei o ‘ntele man, e ‘l foglar co l’odor dela legna che brusava e ‘l föc’ che ne s-ciaudava. Al vecel sliton de legn chel parava la neo da na man… Auter che ades!

L’è vera che Nadal no l’è e no l’era sol spiritualità, ma ancia gran disnaroni, che le feune le se preparava semane prima e a l’ora de merenda se era amò entorna la taola, ma ancia forsi puec prima de la zena.

Nadal, na festa aliegra dele familie, ancia dei parenti pù vizini, del paes, dela val, per far contenti i popi, ma ancia i vecloti.

E ve recordau tut la preparazion del presepi? Ente ciase, ente piaze, enti portegi, enti splazuei, con gran capane, che empareva baite de ciampagna. E zerti i gi meteva ent le statue bele grande de valor, de zes o de porcelana, adiritura ancia dei ani zincanta.

Se viveva el dì en Nadal e dì entorna come fuer dal temp e dal “spazio”. E i vecli proverbi su Dio, el Padre Eterno, el Bambinel i recordaven tra de noi, ma no digi secoi fa, demò fin l’an passà e me auguran de poderlo far ancia chest’an, magiari en puec empresa e senza tanta preparazion. Segur che per muszo el sarà difizil nar, ma ancia a tuer i pezati, par far el famoso albero de Nadal con tuti i globi e i regialeti. Ma calche vecel proverbi che se se contava me plas recordarlo: “Ci no zesuna la vizilia ‘n Nadal l’è piezi den ciaval” – “Ci già respet a pregiar, giabia respet ancia a magnar” – “El Paradis no l’è fat per i poltroni” – “El Sioredio el manda la cros a ci è bon de portarla” – “El Sioredio no’l bastona mai con di bastoni” – “Cuèri contenti el Sioredio no’l nin vuel”.

Ma a Nadal eren tuti contenti. “Ve recordau zerti momenti bei che mei portaven dent par en bel puec?” En zerti paesi dopo la mesa de mezanot se giatava entel plaz en gran falò, con gran flame che le tociava el ziel, en bon blulè de gropel e tanti cueri aliegri. En zerti aotri paesi i cori parochiali o alpini i fava la vouta ciantant con na coa de popi e de grandi e se se fermava ai bei presepi de le cort, dei portegi, dei splazuei o sora le fontane scuertade de as. Ma g’era ancia e g’è i grupi de teatranti che i dì prima o la domengia i feva na bela rapresentazion del bambinel, de pastori, bieze, asni e autra sort de spetacol co la piaza stracolma de zent. Ma fin a tanti ani fa g’era na bela usanza par popi e putati: se nava en grupi da doi o trei dinanzi ale porte de le ciase del paes, dent enti somasi, su par i ponti, par ciantar e rezitar en vecel ritornel, parchè enzì feune, e omni contenti i gi dava vergot, soldi o auter ai popi: “Su pastori ala capana su venite non tardate, le vostre pecore Dio dall’alto guarderà”, l’è sol el ritornelo, en talian, ma pronunzià da popi nonesi!

Belisime le poesie de la Dolores e del Anselmo che le fa en quadret en versi de chel che en zercià noi autre de dir e de scriver en prosa. E con chesto ritornelo e coi versi scasi comoventi volen farve “I auguri da zol fon del cuer a voiautri e a tute le vose familie, a tute le nonese e i nonesi, parenti e ospiti, par en bon Nadal, chel sia meio – en barba al covid – e che el Bambinel el posia regialarme spezialment serenità e salute e che deventien en pöc pu boni”.

BON NADAL!