La nosa val su “Rai uno – linea verde” tour Val de Non

Sabo 3 otober 2020, ore 2 dopo disnar

L’è stà n’ocasion unica per la Val de Non: na trasmision entriegia par le beleze dela val de ogni sort. L’è difizil che na trasmision la giabia enzì tant suceso. Evi scomenzà l’an e mez fa a parlarnin col diretor dela RAI de Trent dott. Sergio Pezzola. Even presentà en prozeto come Asociazion “Orgoi Nones” che la se enteresa dele varie chestion de la Val, zaché Rezia la gi sta dria ala minoranza nonesa ladina. El prozeto d’in prinzipi el se clamava “Dalla profondità della terra alla sommità del cielo”: se voleva entender da zol fon del Canyon dela Noela, (el pu fon d’Europa) ala zima dele nose montagne, l’Ozol, le Madalene, el Brenta e le autre. El dotor Pezzolla da brao bergarmasco no l’à perdù temp e el s’è metù en contato con Roma, cola RAI de Roma e spezialment i responsabili de “Linea Verde”. 

Noi voleven far cognoser a tut Italia i siti, le beleze dela Val de Non, spezialment chei e chele men cognosudi, ancia perché en ziro par l’Italia (e mi von de spes a Roma e Milan) la Val de Non la è cognosuda pù par la Melinda: va ben i pomi, ma no basta. Gen secoi de storia e milioni de ani del nos magnifico teritori, la pu bela o una dele pù bele val de le Alpi, anzi d’Europa. Come che en giatà l’enteres de Roma en scomenzà a laurargi su, spezialment la sotoscrita, come presidente de l’Asociazion.

En grant enteres g’è stà entorna al meleto secolare: i grandi pomari canada, che i già zirca en secol, del Giorgio Dominici, che i resist a tut le bataglie e le malatie, a ste plante no g’è da darge su ngot: encalùn el muer dal vècel, ma le zòme grandiose e maestose l’è na grant atrazion, ‘n esempi de biodiversità, de pomari d’an bot.

Enfati a Roma i è stadi propi entusiasti e i gi à dedicà ai pomari e al Giorgio tuta la prima ziornàda de rezistrazion entorna ala metà de setember: rezista, ziornalisti, operatori televisivi: estra tut ente nà bela ziornada de sol, e i à ancia fat veder el vecel luec del gropel sora al canyon, semper del Giorgio.

Nando dria al programa che evi mandà a Roma, dopo la ripresa del “meleto secolare” è stà dat spazio ai vari paesazi dela val. E’ stà valorizà (come even domandà) la storia, l’archeolozia, la architetura, l’arte, i ciastiei, i eremi; i posti men cognosudi, ma tra i pu spetacolari d’Europa, el canyon da brivido dela Noela, pasant denter en canoa (o kayak) dal lac’ de Santa Zustina, el Mont Ozol, la montagna sacra dei Reti (i primi abitanti dela val a partir dal 3000 a.C.), la malgia de Clouz, i paesi de Proves e Lauregn, el lac’ de Tovel, la so valeta e el Brenta entorna. è stà dat na grant emportanza all’archeolozia col Museo Retico endoche g’è i resti de autari giatadi sul Ozol ndoche i Reti i feva i sacrifizi ai dei, ma ancia i resti giatadi entorna a Sanzen, e chel che resta de tante alzare par la coltivazion dela tera, dei pomi e del’ua, entorna al 300 a.C. ma ancia prima; auter tant spazi è stà dat al Santuari de San Romiedi, al’eremo de San Blasi, su nten croz sora el Canyon dela Noela, el Ciastel Thun de proprietà dela Provincia, el pu bel dela val, con na storia unica e enteresante spiegiada propi ben enti pueci minuti a disposizion, ma ancia “gastronomia di alto livello” che la tös a esempi le rizete nonese d’an bot col chef “stellato” Cristian Bertol.

Ensoma è nù fuera en laoro spetacolare, degno dela nosa val, la nosa storia, dei nosi antenati.  L’ùtol l’è nù ancia dal rilancio dela val par el turismo, ent en an maledet come chesto, con l’istà che no en nancia vist (senza contar el gran laoro sui pomari che no i cognos paze, né ferie).  I gran profesionisti po’ dela RAI de Roma, ma ancia de Trent, i è stadi bravissimi a ciapir le robe pù emportanti, a zernir chele de pu valor, e pù gran efeto e enteres, la nosa e la mia sodisfazion l’è ancia chesta, che la zent nonesa l’à aprezà tantisim; resulta enfati, da ci che sa far sondazi, che propi tanta zent nonesa e trentina l’à vardà la trasmision dal viu e autretanti da internet e dai social. I m’à dit chei da Roma che la trasmision l’è stada vardada almen da en doi (2!) milioni e mez de persone. Eviva la beleza unica dela nosa Val de Non.

Ringrazi e ringrazian tantisim chei che i à aidà: APT Val di Non, Parco Fluviale Novela, l’Assessore Provinciale alla Cultura Bisesti, all’Agricoltura Zanotelli, l’Assessore regionale Cia, el Presidente della Provincia di Bolzano Kompatscher, calche privato.

En ringraziament spezial che el vegn propi dal cuer par i responsabili de tuta l’operazion e la trasmision, al dottor Pezzola a Trent, al dottor Campanile a Roma, a la gran produttrice esecutiva Marina Morbiducci: con chesta me sentiven arcante bote al dì. Ma ancia al bravisim rezista Dario Migliardi, ai autori, ai bravisimi conduttori Federico Quaranta, Giulia Capocchi e Peppone Calabrese, ai operatori, al zoen specialista en droni Daniel Pezzani e ale ziornaliste Paola Pucciatti e Lara Rigotti.

Na sodisfazion ancia per tut el laoro che ai fat i ultimi mesi – e grazie a “il Melo”.